ازاى تحصلى على خصر أصغر وبطن مشدودة في خطوتين بس

الخصر النحيل و البطن المشدودة والوسط الرفيع من زمان أوي وهما من اهم علامات الجمال و الرشاقة، و الحقيقة انه محاولات البنات والستات عشان يتخصلوا من البطن المترهل وبروز البطن مابتنتهيش من بين التمارين وانظمة الريجيم اللي يمكن في أغلب الحالات في الآخر مابيلاقوش النتيجة اللي هما مستنيينها، بس ما تشيليش هم عشان بنات حوا في المقال ده هيعرفوكي بسهولة ازاى تحصلى على خصر أصغر وبطن مشدودة في خطوتين بس، خلينا نبدأ على طول ..

قبل ما تبدأى التمرين ده لازم تسخنى الأول، جربي تجري في مكانك مع انك توطي وضهرك مفرود من وقت للتاني لحوالى 3 دقايق مع فرد دراعاتك ناحية الركبتين، واتحركي بنصك العلوى مع ثبوت رجليكي في مكانهم لليمين و الشمال لـ 3 دقايق، وماتنسيش لازم يفضل ضهرك مفرود.

1- الخطوة الأولي:

نامي على الأرض و افردي الدراعين فوق راسك، ابدأى قومي بنصك اللي فوق وقومي ونامي بحركات بطيئة منتظمة وانتى ضهرك مفرود على قد ما تقدري، وحاولى تقربي بنصك اللي فوق ركبتك كمان على قد ما تقدري، وحاولى تشدى او تشفطي عضلات بطنك اثناء التمرين و بعد كده نامى تاني مفرودة على الأرض وانتى رافعه ايديكى ورجليكي مفرودين في الهواء لفوق و كرري من 10 لـ 15 مرة.

2- الخطوة الثانية:

هنبدأ بنفس الوضع اللي بدأنا بيه الخطوة الأولى، المره دي هنشتغل على عضلات البطن المائلة، عشان كده وانتى بتقومي حاولى تحركي وسطك لليمين و الشما ل زي تمارين التويست، ويكون اتجاه كوعك في الناحية المعاكسة لركبتك، يعنى لو هتحركي كوعك اليمين يبقى حركيه ناحية الركبة الشمال و العكس، الكوع الشمال ناحية الركبة اليمين وعشان تخلى وسطك يتحرك أفضل، خلى كتفك يتجه بعيد عن جسمك على قد ما تقدري، كرري الخطوة دي 10 مرات و بدلي بين الجنبين.

كرري الحركتين دول على الاقل 4 مرات في الاسبوع و هتلاقى نفسك بقى عندك وسط أرفع و بطن مشدودة مع مرور الوقت.