10 أفكار مختلفة تستخدمي بيهم ستيكر الحائط عشان تزيني بيتك

بتدورى على أفكار جديدة وبسيطة تغيرى بيها من ديكور بيتك أو أوضتك بس عاياها في حدود ميزانيتك وتكون تكلفتها بسيطة، احنا لقينالك الحل، في المقال ده بنات جوا هيعرفوكي على 10 أفكار مختلفة تستخدمي بيهم ستيكر الحائط عشان تزيني بيتك، خلينا نعرفهم مع بعض ..

1- ستيكر النجوم :

ستيكر بسيط وسهل تلاقيه في أى محل للوازم الديكورات أو ورق الحائط، طريقة ترتيب النجوم المنتشرة حلوة اوي وبتدي شكل لطيف مهما كانت لونها، بس طبعا تقدري ترتبيها في أي شكل تحبيه.

2- ستيكر النقط الذهبية:

النقط أو الدواير باللون الدهبي أو في الحقيقة أيا كان لونها بيبقى شكلها حلو، وسهل جدا تنفذيها بإيدك في البيت، رتبيهم في أي شكل تحبيه.

3- ستيكر الأشكال الهندسية:

ديزاينز الأشكال الهندسية بتدي دايما أبعاد جديدة للمساحة في أوضتك وممكن تخليها تبان أوسع ومودرن أكتر، جربي الستيكرز الهندسية بأشكالها المختلفة.

4- ستيكرز الزهور:

الزهور والورود طبعا بتدي شكل جميل في أي حاجة، سواء لو كانت في ستارة أو في أنتريه أو طبعا في ستيكرز وورق الحائط، جربي ستيكرز الزهور بألوانها وأشكالها المختلفة.

5- ستيكرز الفراشات:

الفراشات كمان من الأشكال اللي بتدي منظر جميل للمكان، ممكن تجربي ستيكرز الفراشات بألوانها المختلفة.

6- ستيكر المراية:

هتبقى حاجة حلوة لما تبصي في المراية كل يوم الصبح أول ما تصحى من النوم وتلاقي جملة حلوة مستنياكي، جربي ستيكر المراية بأي جملة تحبيها وإلزقيه على مراية الحمام أو مراية أوضتك.

7- ستيكر المراية والإضاءة :

ممكن كمان تجربي مع ستيكر المراية تزودي إضاءة في أوضتك، جو الإضاءة المخلتف هيغير من مود الأوضة وهيخليكي تحبيها أكتر.

8- ستيكر أشكال الطيور:

أشكال الطيور المختلفة على زاوية الباب أو الشباك هتدي شكل جميل وجديد لبيتك.

9- ستيكر الريشة:

ممكن كمان تجربي ستيكر الريشة لو مابتفضليش الزهور أو الفراشات وبتدوري على حاجة مختلفة.

10- ستيكر البرواز:

جربي تجمعي الستيكرز المفضلة عندك في برواز واحد وتستخدميه كلوحة أو ديكور في أوضتك، دي تعتبر فكرة جديدة وحلوة جدا.