10 حاجات دكاترة الجلدية بينصحوا متحطيهاش على بشرتك

هل نعرف ان صناعة مستحضرات التجميل مش منظمة لحد كبير جدا, يعني مش لازم ادارة الغذاء والدواء توافق على منتجات العناية بالبشرة قبل ما تنزل السوق, وبالتالي ممكن منتجات كتير موجودة ممكن تضر البشرة, عشان كده دكاترة الجلدية بيحذروا من منتجات معينة اننا المفروض نتجنب نحطها على بشرتنا, والنهاردة من خلال موضوعنا هنقولك على 10 منتجات متحطيهاش على بشرتك.

منتجات متحطيهاش على بشرتك:

1- مقشرات البشرة:

اكيد احنا قولنا قبل كده ان تقشير البشرة مهم, بس اهم حاجة انه ميكونش زيادة عن اللزوم يعني ممكن يتعمل كل 10 – 15 يوم, لانه ممكن يسبب تهيج وجفاف الجلد خصوصا في الايام البرد لازم نقلل من التقشير, كمان استخدام الويبس او وسادات البشرة الاحتكاك بتاعها على البشرة ممكن يسبب تهيج وخصوصا للبشرة اللي بتعاني من حب الشباب والاكزيما.

2- الزيوت المعدنية:

دكاترة الجلدية بينصحوا بتجنب الزيوت المعدنية لانها بتبقى تقيلة على البشرة وممكن تسد المسام وده ممكن يأدي لمشاكل تانية زي حب الشباب, والرؤوس السودا, والحبوب اللي تحت الجلد.

ومن الزيوت المعدنية المنتشر استخدامها زيت البارفين السائل, والفازلين السائل, وزيت البرافين, والبارافينيوم السائل, وسوائل الفازلين, والزيت المعدني الابيض, والزيت الابيض, انواع الزيوت دي كلها ممكن نلاقيها داخلة في مكونات مستحضرات كتير عشان كده لما تيجي تشتري اي منتج عناية للبشرة اقري مكوناته كويس واتجنبي المنتج اللي بيحتوي على اي نوع زيت من الزيوت المعدنية.

3- الصابون العادي:

احنا دايما بننصح بنات حوا ميستخدموش الصابون العادي لتنضيف البشرة ودكاترة الجلدية بيأكدوا على المعلومة دي ان الصابون ممكن يكون قاسي على البشرة ويجردها من العناصر الغذائية الاساسية, لانه بيكون داخل في مكوناته مواد كيميائية قاسية ومش طبيعية بتزيل كل الزيوت الطبيعية اللي بتغذي البشرة وده بيخليها تفقد رطوبتها ويخليها خشنة وجافة ومقشرة, عشان كده الافضل تستخدمي غسول مناسب لنوع بشرتك.

4- العطور:

تقريبا معظم منتجات البشرة بتحتوي على عطور صناعية, والمشكلة ان العطور دي بتأدي لتهيج البشرة, ده غير انها بتسبب حساسية والتهاب الجلد, وضيق التنفس.

وخلي بالك ان كلمة عطر مش هتلاقيها مكتوبة بشكل مباشر على المنتج هتكون مكتوبة بطريقة غير مباشرة, وهنلاقي العطور داخلة في منتجات كتير زي الشاور جل, الكولونيا, البلسم, المرطبات, وطبعا العطور.

5- تقشير ندبات البشرة بالفرشة:

لو عندك ندبات على البشرة اتجنبي استخدام فرشة البشرة عليها لانها ممكن تسبب تهيج الجلد, والدكاترة بينصحوا باستخدام انواع الغسول الكريمي اللي فيها حبيبات صغيرة باستخدام ايديكي وبعدين نشفيه بالفوطة.

6- الديرمارولر:

احنا اتكلمنا قبل كده عن فوايد الديرمارولر للبشرة, وقولنا مهم جدا اننا نحافظ على نضافتها لانها بتعمل ثقوب في البشرة ولو مش متنضفة كويس ممكن تنقل عدوى للبشرة, عشان كده لو مش هتقدري تعتني بيها كما يجب وتستخدميها بطريقة صح, يبقى الافضل انك تعمليها في مركز متخصص او عند دكتور جلدية عشان البيئة تبقى انضف واكتر امان وتضمني انه ميتنقلش للبشرة اي عدوى.

7- التقشير الكيميائي في البيت:

ممكن تكون منتجات التقشير الكيميائي في البيت وسيلة سريعة ومش مكلفة نسبيا وبتوصلك لبشرة خالية من اي عيوب, لكن مع ذلك هي ممكن تسبب مشاكل كبيرة للبشرة, زي الندبات, والتقرحات, والتورم, والحساسية.

كمان متخصصين الجلدية لاحظوا ان في مشاكل جلدية زي التجاعيد الخفيفة والقوية والانتفاخات التقشير الكيميائي مش بيجيب معاها نتيجة, وبينصحوا ان اي حد بيعاني من مشاكل جلدية الافضل يستشير دكتور متخصص عشان يحدد العلاج المناسب للبشرة وللحالة.

8- البوتوكس:

البوتوكس اللي بيستخدم لحقن البشرة يعتبر من اكتر المواد السامة اللي ممكن تدخل بشرتك, عشان كده دكاترة الجلدية بيحذروا منه جدا.

9- منتجات البشرة المعتمدة على الكحول:

الكحول لما البشرة لما بتمتصه مش بس بيسبب تهيج وجفاف البشرة, لكن كمان بيسبب مشاكل جلدية زي حب الشباب, والاكزيما, والوردية.

ودكاترة الجلدية بينصحوا دايما لما تيجي تختاري اي منتج للبشرة اختاري اللي بيعتمد في مكوناته على المية بدل الكحول لانه مش هيسبب جفاف البشرة.

10- الشامبو:

ساعات في حالات الطواريء ممكن بنات يستخدموا الشامبو للبشرة لو مش متوفر عندهم منظف البشرة, لكن لازم نعرف ان الشامبو معمول اصلا لتنضيف الشعر مش البشرة, لان الشامبو بيحتوي على مكونات بتزيل الاتربة والزيوت وبتنضف فروة الراس وبتكون مناسبة جدا للشعر, لكن قاسية جدا على البشرة لما تمتصها.