ديتوكس التوابل: 7 انواع توابل هيساعدوا على تنظيف جسمك من السموم

في طرق كتير تقدري تعملي بيها ديتوكس عشان تخلصي جسمك من السموم, واحنا اتكلمنا قبل كده في اكتر من موضوع عن اكتر من طريقة للديتوكس, وواحدة من طرق الديتوكس اللي هنقولها النهاردة هي ديتوكس التوابل لتنضيف الجسم من السموم, التوابل معروفة بخصائصها المضادة للبكيتريا والمضادة للالتهابات, وتعتبر طريقة فعالة جدا للتخلص من سموم الجسم, ومن خلال موضوعنا هنتعرف على 7 انواع توابل لتنضيف الجسم من السموم عشان تدخليها في نظامك الغذائي.

ديتوكس التوابل لتنضيف الجسم من السموم:

1- الزعفران:

الزعفران من التوابل اللي مهم جدا تدخليها في نظامك الغذائي وتستخدميها دايما في اكلاتك واطباقك بشكل يومي, عشان تحافظي على جسمك خالي من السموم, والزعفران مفيد جدا للكلية والمثانة اللي هيسمحوا بمرور السموم عن طريق البول انها تخرج بره الجسم وينضفوا بشكل كامل, كمان مفيد جدا للكبد اللي يعتبر اهم جهاز في الجسم لمنع السموم, ودايما اتأكدي انك بتاكلي التوابل اللي بتساعد الكبد بشكل خاص او مفيدة ليه لان الكبد يعتبر اللوحة الرئيسية لكل اجهزة وانظمة الجسم التانية.

2- الثوم:

الثوم يعتبر مصدر غني جدا بالكبريت, اللي بيساعد بطريقة فعالة جدا على اخراج كل المواد السامة من جسمك, والثوم تقريبا من اكتر المكونات اللي بنستخدمها في المطبخ دايما يعني هيكون متواجد باستمرار في نظامك الغذائي.

3- الحبهان:

الحبهان بيساعد على ازالة البكتيريا الضارة من الجسم من غير ما يدمر البكتيريا المفيدة في نفس الوقت, ولما تستخدمي الحبهان مع انواع توابل تانية من اللي بتساعد على الهضم زي الكمون والكركم والزعتر والمرمرية هيكون مفعولهم مع بعض قوي جدا في قتل البكتيريا, وطرد السموم من الجسم, والحبهان ليه فايدة تانية مهمة جدا غير انه ممكن يستخدم كديتوكس كمان هو يعتبر مضاد للاكتئاب.

4- الكمون:

الكمون يعتبر مضاد قوي للاكسدة ومزيل للسموم, الكمون كمان بيساعد على الهضم واللي يعتبر عامل مهم جدا للتخلص من اي سموم في الجسم, لان لو الجسم بيفرز سموم وفي نفس الوقت الهضم بطيء هتفضل السموم جوه الجسم وممكن ينتهي في الاخر ان الجسم يمتص السموم مرة تانية لو مقدرش يتخلص منها, عشان كده مهم جدا انك تستخدمي توابل زي الكمون تساعدك على الهضم وطرد السموم من جسمك.

5- الكركم:

الكركم بيساعد الكبد انه يأدي وظايفة بشكل صح وبالتالي ده بيساعد على طرد السموم, وليه فايدة تانية مهمة جدا الكركم بيحتوي على خصائص قوية مضادة للسرطان بتخليه افضل اختيار لاي شخص عايز يحافظ على صحته ويخلي الامراض بعيد عنه, ممكن تستخدمي الكركم في الاكلات او تاخدي مكملات الكركم مع مكون الكركمين النشط كمكمل غذائي.

6- الزنجبيل:

الزنجبيل بيساعد الجسم على امتصاص العناصر الغذائية والمعادن اللي موجودة في الاكل, وفي حاجة مهمة جدا لازم نعرفها ان الموضوع مش بس التخلص من السموم لكن كمان اننا نستبدلها بالحاجات اللي محتاجها الجسم, واستخدام توابل زي الزنجبيل هيخلي جسمك يقطع شوط كبير جدا في امتصاص الحاجات المفيدة اللي محتاجها, بالاضافة طبعا انه بيزيل السموم من الجسم.

7- الفلفل الاسود:

الفلفل الاسود مفيد جدا في مساعدة الجسم على تطهير نفسه من السموم, وكمان بيساعد على تسريع عملية التمثيل الغذائي, وده بيساعد على انقاص الوزن بسهولة بنفس مقدار ازالة السموم من الجسم, بيساعد كمان في عملية الهضم اللي زي ما قولنا تعتبر عامل مهم في تخليص الجسم من السموم بشكل صح.

اكيد زي ما قولنا التوابل دي مفيدة للجسم لكن لازم نتأكد بردو من الاثار الجانبية لاي نوع, لان ممكن يكون بعض الانواع قوية واكيد احنا مش عايزين الاثار الجانبية تكون اكتر من الفوايد, وممكن نوع توابل يأثر على شخص وميأثرش على شخص تاني ده بيعتمد على عوامل كتير, عشان كده الافضل في البداية استخدام كميات صغيرة ولو مافيش اي اثار جانبية ممكن تزودوا الكمية.