8 علامات تقولك ان في شخص غيران منك..وازاي تصلحي سلوكهم وتتفادي غيرتهم

الشخص الغيور عادة بيكون مصدر ازعاج للي حواليه وفي نفس الوقت هو بيعذب نفسه بالغيره من غيره, واسوأ حاجة ممكن نقابلها في حياتنا اننا نحس ان اللي حوالينا مش حاسين بالفخر او بالايجابية من نجاحنا لكن حاسين بالغيرة من النجاح ده, وهتلاقي الشخص ده بتطلع منه تصرفات من غير قصد بيعبر بيها عن غيرته منك, واكيد كلنا مرينا بالموقف ده ولو مرة واحدة في حياتنا حتى وحسينا انه في شخص غيران مننا وبيبقى صعب التعامل معاه لان في النهاية احنا نقدر نتحكم في مشاعرنا احنا لكن منقدرش نتحكم في مشاعر اللي حوالينا, والنهاردة من خلال موضوعنا هنعرف مع بعض 8 علامات تقولك ان في شخص غيران منك ولما تعرفيه دي ممكن تكون الخطوة الاولى عشان تصلحي الموقف.

علامات تقولك ان في شخص غيران منك:

1- هيقولك مدح كداب:

الشخص الغيور على غير المتوقع هتلاقيه اول واحد ممكن يقولك مجاملة او يمدحك في اي موقف, ويحاول يبين انه مش غيران او يداري الجانب السلبي اللي جواه, ومع ذلك هتلاقي الشخص ده اول ما انتي ما تمشي من المكان هيبين مشاعره الحقيقية لكن مش هيبينها قدامك.

الشخص الغيور دايما هتلاقيه بيحاول يتظاهر بعدم الغيرة في اي موقف, وعشان تتفادي غيرته وتحوليه لشخص مش غيور منك, انك تجامليه او تمدحيه بصدق في اي موقف كويس بالنسبة له, ده ممكن يساعدهم انهم يشوفوا انك شخص حقيقي وصادق وفرحان لفرحتهم, وده هيساعد شوية انه يقلل من الغيرة.

2- هيقللوا من نجاحك:

بغض النظر عن النجاح اللي حققتيه او الصعوبات اللي واجهتيها عشان توصلي لهدفك او للنجاح ده هتلاقي الشخص الغيور هيحاول يقلل من نجاحك وتعبك ويحبطك ويحسسك ان نجاحك مش اكتر من مجرد حظ, او انك متعبتيش اوي يعني عشان توصلي للنجاح ده ويقلل ويحقر من مجهودك.

ودايما هتلاقي الاشخاص اللي بيغيروا منك هما اكتر ناس نفسهم يبقى عندهم اللي عندك.

وعشان تتفادي ده متحاوليش تتباهي زيادة عن اللزوم بنجاحك قدامهم عشان متزوديش غيرتهم اكتر وتخلي الوضع يسوء اكتر, يعني خليكي متواضعة وكفاية انتي من جواكي مبسوطة وراضية عن نجاحك.

3- التباهي بنجاحهم:

هتلاقي الشخص الغيور بيتباهى بنجاح يمكن ميستحقش التباهي بيه, وهتلاقيهم بيتباهوا بالنجاح ده اثناء ما انتي بتحتفلي بنجاحك عشان يلفت الانظار ليه هو, وهتلاقي النوعيات دي من الاشخاص مثلا واحدة تتخطب في فرح واحدة صاحبتها او قريبتها عشان تاخد منها الانظار.

وليه هنلاقيهم بيتصرفوا كده لان الاشخاص الغيورين بيبقوا مليانين بالافكار السلبية مش بس اتجاه الاشخاص اللي هما بيغيروا منهم لكن كمان اتجاه نفسهم وانهم دايما متصورين انهم هيفشلوا.

وعشان نصلح من السلوك ده حاولي انك ترفعي من معنوياتهم وهنيهم من قلبك وبصدق اوي عن اي انجاز او نجاح هما حققوه مهما كان صغير, ودي تعتبر طريقة كويسة جدا وناجحة لتغيير سلوكهم مع الوقت.

4- هيقلدك:

الشخص الغيور بدل ما انه عايز يبقى احسن منك هتلاقيه بيقلدك في كل حاجة, ممكن يقلدك في طريقتك او في اسلوب كلامك او ستايل لبسك, لمجرد بس انه يحس شعور احسن اتجاه نفسه, وبدل ما تتضايقي من ده وتزودي المشكلة ممكن تشجعيهم انهم يكونوا نفسهم ويبقى ليهم شخصيتهم المستقلة وطريقتهم الخاصة بيهم, ودايما اديهم دفعة ايجابية وحمسيهم, ووصلي لهم انهم مش لازم يكونوا زيك عشان يبقوا كويسين او ناجحين وممكن هما يبقوا ناجحين واحسن بشخصيتهم هما.

5- هينافسك دايما:

الاشخاص الغيورين هتلاقيهم هما اللي دايما بينافسوكي بقوة جدا لانهم عايزين دايما النجاح يكون ليهم هما وعايزين يثبتوا دايما انهم متفوقين واحسن منك.

وعلى الرغم من ان النجاح اكيد حلو وهنحب اننا ننافس عشان نبقى احسن لكن حاولي مدخليش نفسك في منافسة غير صحية او غير شريفة, يعني ارفضي اللعب بطريقتهم, ده هيخليهم مش هيستمروا بالطريقة دي لما هيشوفوا انك مش متجاوبة معاهم او مش ماشية على نفس طريقهم.

6- هيحتفل بفشلك:

الشخص الغيور هتلاقيه مبسوط جدا لو انتي فشلتي او عملتي غلطة, او حد وبخك او كلمك بشكل مش حلو, او صحح لك حاجة انتي عملتيها سواء في الشغل او الدراسة, وبرغم انه ممكن ميظهرش ده لكن هو بينه وبين نفسه هتلاقيه مبسوط وسعيد جدا بفشلك او انك اتحطيتي في موقف مش حلو.

وفي الحالة دي دايما فكريهم ان ارتكاب الاخطاء ده جزء من حياتنا وطول ما احنا عايشين هنغلط, وانك مش متضايقة خالص من ده, انتي في الحالة دي هتحرميهم من متعة الانبساط او الفرح بفشلك.

7- هيتكلموا عليكي من ورا ضهرك:

الاشخاص اللي بيغيروا منك هتلاقيهم بيتكلموا عليكي دايما من ورا ضهرك مع كل اللي حواليكي بطريقة خبيثة ومش حلوة, وافضل طريقة للتعامل مع الشخص ده هتكون بالمواجهه بشكل مباشر.

لان لو اتصرفتي بشكل سلبي معاهم انتي مع الوقت هتتأثري وهيبقى عندك مشاعر سلبية وغضب وشك في نفسك, وعقلك هيبقى مركز انتباهه مع الانتقاد والحاجات السلبية, ويمكن ده مش هيمنعك توصلي لاهدافك وتحققي نجاح لكن ممكن يأخرك وياخد من وقتك.

وبما ان الاشخاص الغيورين مش بيميلوا للمواجهة المباشرة, فالكلام معاهم بجدية وبحزم في الموضوع ده هيكون كافي انهم يعيدوا التفكير في سلوكهم, او يبطلوا التصرفات دي تماما.

8- هيكرهك من غير سبب:

لو في شخص في حياتك بيكرهك لسبب تافه او من غير سبب واضح في الحالة دي يبقى هو مجرد شخص غيور منك, والنوع ده من الشخصيات بيكون صعب التعامل معاه جدا لانه بيكون كره من غير اي سبب, وممكن تحسي انك عايزة تظهري للشخص ده انك حد محبوب من اللي حواليكي كلهم ولكن ده هيكون بردو من غير نتيجة من النوعية دي بشكل خاص, عشان كده افضل حاجة انك تخرجيهم من حياتك خالص, لانك اكيد مش محتاجة للمشاعر السلبية دي في حياتك, وهما في الغالب مع الوقت هتلاقيهم بيحاولوا يكرهوكي اكتر من غير سبب, عشان كده افضل طريقة انك تتخلصي منهم تماما.

يمكن يكون الشخص الغيور صعب التعامل معاه, وساعات ممكن يجي عليكي وقت هتبقي عايزة تواجهيه بغيرته منك, لكن زي ما قولنا التعامل معاه بايجابية هو افضل طريقة من غير مواجهته بعيبه, والعلامات اللي احنا قولناها هتساعدك تعرفيه بسهولة عشان تقدري تتعاملي معاه بالطريقة الصح.