ازاي تعملي ماسك Peel off الخضروات في البيت لبشرة نضرة وخالية من العيوب

ماسك Peel off الخضروات من الماسكات المفيدة جدا للبشرة لانه بيوفرلها مضادات الاكسدة والفيتامينات اللي بتغذيها وبتعالج كتير من مشاكل الجلد, والنهاردة هنقولك ازاي تعمليه بنفسك في البيت وايه فوايده للبشرة.

– فوايد ماسك Peel off الخضروات:

1- الخضروات بتحتوي على معظم المواد الغذائية المفيدة جدا للبشرة.

2- بتحتوي على المواد المضادة للاكسدة اللي بتحمي البشرة من التجاعيد المبكرة والخطوط الرفيعة.

3- بتحتوي على المغذيات المفيدة اللي هتساعد بشرتك تبقى نضرة وصحية وتمنع مشاكل الجلد.

4- بيساعد على تنعيم البشرة بعمق من الطبقات الداخلية.

5- بيساعد على ازالة الرؤوس السودا والبيضا.

– مكونات ماسك Peel off الخضروات:

جيلاتين.

اي نوع عصير خضروات حسب نوع بشرتك “خيار, طماطم, جزر, بطاطس, وغيرها من الخضروات”.

مية ورد.

بيضة “اختياري”.

– طريقة عمل ماسك Peel off الخضروات:

هنعمل ماسك بعصير الخيار وتقدروا تعملوا نفس الطريقة مع اي نوع عصير خضار تاني, هنستخدم في الوصفة ½ كوباية جيلاتين, وكوباية عصير خيار, وعلى حسب نوع بشرتك لو جافة يبقى عصير الخيار يكون اكتر من الجيلاتين, اخلطيهم مع بعض كويس ودوبيهم على حمام مية سخنة لحد ما الجيلاتين يدوب خالص وميبقاش فيه اي كتل.

– طريقة استخدام ماسك Peel off الخضروات:

قبل تطبيق الماسك على البشرة, اعملي بخار لبشرتك لمدة 15 دقيقة عشان تفتحي المسام, بعدها امسحي بشرتك كلها بقطنة فيها مية ورد, دلوقتي خدي كمية صغيرة من خليط الجيلاتين والخيار اللي انتي عملتيه ودلكي بيه بشرتك في حركات دائرية لمدة 15 دقيقة على الاقل, بعد التدليك ضيفي بيضه على باقي الخليط اللي عندك وافرديه على البشرة وسيبيه 10 دقايق او لحد ما ينشف خالص, وقشريه من على البشرة من تحت لفوق, بعدها اغسلي وشك بمية فاترة وادهنيه بقطنة فيها لبن لمدة دقايق وبعدين اغسليه بمية عادية.

وممكن تستغني عن البيضة وتفردي الماسك على وشك على طول من غير بيض.