ايه اللي هيحصل لجسمك لو شربتي مية بالسكر وازاي ممكن تفيدك

ثبت ان الكربوهيدرات بتعزز الاداء الرياضي وبتعزز القدرة على التحمل, عشان كده هنلاقي كتير من الرياضيين بيشربوا مشروبات الطاقة قبل او اثناء او بعد التمرين عشان تحسن ادائهم وتزود قوة تحملهم, طيب بالنسبة للمشروب البسيط اللي هو المية بالسكر, هو ده اللي هنعرفه النهاردة من خلال موضوعنا هنقولك ايه هي فوايد المية بالسكر للجسم.

عادة الجسم بياخد السكر اليومي من المشروبات الغازية, او من عصاير الفواكة, لكن المصادر دي تعتبر مش صحية او مش هي الاختيار الافضل للجسم.

فوايد المية بالسكر للجسم:

– بتدي الجسم دفعة طاقة سريعة:

معظم الناس عارفين ان اكل السكر كتير في النظام الغذائي مش كويس صحيا, وخبراء التغذية بيوصوا اننا المفروض ناخد 10% من السعرات الحرارية اللي محتاجها الجسم من السكريات, لكن في اوقات الجسم بيكون محتاج تعزيز فوري للطاقة.

ولما تشربي المية بالسكر, جسمنا بيمتص جزئيات السكر لمجرى الدم, وبعدين الخلايا بتاخدها وبتحولها لطاقة, والابحاث اثبتت ان المكونات البسيطة نسبيا اللي موجودة في المية بالسكر ممكن تكون مصدر طاقة افضل من المشروبات المتحلية بالسكر اللي موجودة في الاسواق.

– ازاي نعمل مشروب المية بالسكر:

طريقة تحضيره بسيطة جدا كل اللي هتعمليه هضيفي معلقة سكر كبيرة لكوباية مية وتقلبيها لحد ما السكر يدوب, ولازم نعرف ان السكر اللي بنستخدمه في البيت مختلف عن السكر المستخدم في المشروبات المتحلية بالسكر اللي بتتباع جاهزة.

المية بالسكر اللي احنا بنعملها في البيت بتحتوي على السكروز, لكن المشروبات الجاهزة اللي متحلية بالسكر بتحتوي على الجلوكوز مع انواع سكريات تانية زي سكر الفواكه, شراب الذرة, وغيرها من انواع السكريات.

والسكروز هو ثنائي السكاريد اللي بيتكون من 2 جزيء سكر, اللي هما الجلوكوز والفركتوز, والدراسات البريطانية اثبتت ان الطريقة اللي جسمنا بيستخدم بيها السكروز افضل واكتر فاعلية من جزئيات السكر التانية.

– ليه المية بالسكر افضل من المشروبات التانية المتحلية بالسكر:

في الظاهر كده هنشوف ان عصاير الفواكة ومشروبات الطاقة ومية الفيتامين كلها بتحتوي على نفس المكونات الاساسية للمية بالسكر, لكن ده مش صحيح لان في فرق بين المية بالسكر والمشروبات التانية المتحلية بالسكر.

غالبا المشروبات المحلاة اللي بنشتريها من بره بيكون فيها مكونات اضافية زي الكافيين ونكهات الطعام والملونات, وكمان المشروبات المحلاة وخصوصا مشروبات الطاقة بتكون غالية, لكن المية بالسكر رخيصة في المتناول ونقدر نعملها بكل سهولة.

كمان الجلوكوز المخلوط بالطاقة ومشروبات الفواكة ممكن تسبب مشاكل او عدم راحة في المعدة, لكن المية بالسكر بتتهضم بسرعة وبسهولة ومش بتسبب اي مشاكل.

– ليه الرياضيين بيختاروا المية بالسكر:

زي ما قولنا ان الابحاث اثبتت فايدة المية بالسكر لكل الناس, لكن هي ليها فوائد اضافية للرياضيين بشكل خاص او اللي بيمارسوا رياضة بشكل منتظم.

الكربوهيدرات بتساعد على استعادة مستويات الطاقة اثناء التمرين, لكن معدل استعادة الطاقة هو ده اللي بيعمل فرق حقيقي فعلا خلال التمرين المكثف, وزي ما قولنا ان معظم المشروبات الرياضية بتحتوي على خلطة او توليفات من الجلوكوز اللي ممكن تسبب عدم ارتياح في المعدة, على عكس المية بالسكر اللي ثبت انها بتعيد طاقة الجسم بشكل اسهل واسرع من مشروبات الطاقة.

يعني لو هتمارسي تمارين عنيفة او هتتمرني لوقت طويل وعايزة تفضلي محافظة على طاقتك وتعملي افضل ما عندك يبقى استبدلي مشروبات الطاقة او المشروبات المحلاة اللي بتشتريها من بره بمشروب المية بالسكر اللي تقدري تعمليه في البيت بكل بساطة.

– ايه افضل وقت تشربي فيه المية بالسكر:

في حالات او اوقات المية بالسكر مش بس بتكون صحية للجسم لكن كمان ضرورية لتعزيز كمية الكربوهيدرات عشان كده افضل الاوقات ليها.

قبل واثناء وبعد التمارين الرياضية سواء في الجيم او في البيت.

اثناء الانشطة عالية الكثافة او اللي محتاجة مجهود كبير زي المشي مسافات طويلة, ركوب العجل, التزلج على المية, او لو قعدتي فترة طويلة من غير اكل وكان في فترة كبيرة بين الوجبات.

لو محتاجة زيادة سريعة وفورية في الطاقة من غير ما تحسي بالامتلاء.

– ايه الكمية المفروض تشربيها من المية بالسكر:

المفروض انك تشربي منها بشكل معتدل زيها زي كل انواع الحلويات.

للتمارين الرياضية اللي محتاجة قوة تحمل زي مثلا ركوب العجل, افضل كمية هي استهلاك 7 معالق سكر كبيرة في الساعة, بمقدار 1 ½ معلقة كبيرة على كل كوباية المية.

للتدريبات اللي محتاجة مجهود اقل قللي كمية السكر للنص.

لو مش بتمارسي رياضة خالص لكن في نفس الوقت محتاجة طاقة سريعة خلال اليوم, يبقى الافضل متاخديش اكتر من 2 معلقة صغيرة سكر لكل كوباية مية.