خطيبي كان زعلان مني وحاولت أصلحه روحتلوا الشقة والوقت خدني بدل الساعة ثلاث ساعات

خطيبي كان زعلان مني وحاولت اتصل بيه مش بيرد وقررت اروحله البيت وهو عايش لوحده بصراحة مفكرتش ان إللي بعمله ده غلط كل اللي فكرت فيه عاوزة أشوفه واخليه يسامحني عشان غلطتي مش سهلة.

روحتله واتضايق وقال انتي ايه اللي جابك هنا قولتله جيت اعتذر وهزقني زي مانت عاوز وخلينا نتصالح بقا قال انتي فعلا محتاجة تتهزقي دلوقتي لو حد شافك هيقول عنك ايه وفضل يأنب فيا وبعدين قالي ادخلي اغير هدومي ونطلع نتكلم بره عشان محدش يتنيل يشوفك.

المهم انا دخلت لقيت الشقة عبارة عن زريبة حرفيا مش فاهمه مستحمل يعيش فيها إزاي صعب عليا جدا بصراحة ميهونش عليا انا اسيبه عايش ف الوضع ده بصراحة. عملت معاه deal يسامحني وانا انضفله شقته بهزار يعني وطلبت منه يروح يشوف اي حتة يقعد فيها ولما اخلص هرن عليه.

الوقت خدني كنت متفقة معاه علي ساعة عدت تلات ساعات ولقيته داخل وانا قاعدة متطمنة وبراحتي تماما انا اتوترت وجريت ع اي اوضة البس هدومي وطلعت اتخانقت معاه انه دخل من غير مايخبط وعارف اني جوه وكنت هخرج وهو شدني من ايدي وقال خلاص محصلش حاجة مكنش قصدي قولتله نتخانق بره طيب خلينا نطلع من هنا كنت متوترة وخايفة لأني حسيت نظراته ناحيتي مش بريئة.

وبدأ يقول كلام مش برئ بردو ويتغزل ف جسمي ويتمادي ف الكلام ودي اول مرة يعملها وكل ماحاول اخرج يمسكني من ايدي ومنكرش ان الكلام بتاعه كان بيأثر معايا وكنت بحاول اهرب بأي طريقة عشان حسيت أني بتزفت بضعف من طريقة كلامه ونظراته وده اللي حصل للأسف وحصل تاتش لمدة كام ثانية وبعدين انا فلت نفسي منه وخرجت بسرعة.

من ساعتها وانا بتهرب منه وعمالة اسأل نفسي هو انا حقي ازعل منه ولا لا وهو ياتري شايفني مش كويسة وهيفشكل ولا إيه نظامه انا مش عارفة ازعل منه ولا من نفسي عشان مكنش ينفع اصلا اروحله البيت وانا عارفة انه لوحده ولا كان اقبل ان اقعد لحظة ف الشقة وهو فيها وانا مش عارفة احدد هو وحش وكان عاوز يستغلني ولا ايه بالظبط!!

انا عارفة اني غلطت من غير إهانة لو سمحتوا انا محتاجة أعرف اتعامل مع الوضع إزاي بعدين واتعامل معاه إزاي وهل هو شايفني وحشة ؟!

اترك رد

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.